Balade 146 : Le suaire ou Dieux fut cousus (CXLVI)

Autre Balade[1]

                        Le suaire ou Dieux fut cousus
                        Les cinq plaies dont Dieux saingna,
                        Le sepulcre ou fut estendus,
                        La couronne et croix qu’il porta
5                      Et le saint sang que Dieu roya,
                        Jurent hui maint, mais c’est folie.
                        Par la passion que Dieux beneie
                        Nous est paradis restabli,
                        Par cellui que Judas vendi,
10                    Par la mort dont Dieux vint a vie.

                        Helas ! dont sont telz mos venus ?
                        Par cellui qui tous nous crea,
                        Par le benoist Dieu de lassus,
                        Par cellui qui nous jugera
15                    Vivons nous touz, et si n’y a
                        Si meschant qui encor ne die
                        Je regni Dieu, chascune fie,
                        A Dieu le veu, a Dieu l’affy,
                        Par le sang dont pierre fendi,
20                    Par la mort dont Dieux vint a vie.

                        Encores ay je d’autres veus
                        Jurer le sang que Dieux spietta,
                        Et par le ventre Dieu le plus,
                        Par le sacre que Dieux sacra,
25                    Par cil qui sa mort pardonna,
                        Par les[2] sains qu’en aoure et prie,
                        Par les cloux Dieu, par l’escourgie,
                        Par les angoisses qu’il souffri,
                        Par le saing sang que Dieux radi,
30                    Par la mort dont Dieux vint a vie.

[1] Même sujet et mêmes rimes que la précédente

[2] Ms. tous les