Balade 145 : Je me merveille d’un abus (CXLV)

Balade

                        Je me merveille d’un abus,
                        Quant et pourquoy en commença :
                        A jurer Dieu et ses vertus
                        Ne les grans sermens qu’on orra,
5                      C’uns chetis pour neant vourra
                        Jurer Dieu et sa progenie,
                        Par le sang de Fescamp l’abbaie,
                        Par le serment du pillori,
                        Par le sang de Bruges aussi
10                    Par la mort dont Dieux vint a vie.

                        Mais c’est mal fait, ne juréz plus,
                        Car, par cellui qui vous forma,
                        Par le precieus corps Jhesus,
                        Par le sang que Dieux estaura,
15                    Par le saint sang que Dieux lança,
                        Fut sauvee humaine lignie,
                        Dont amours et sa compaignie
                        Aussy vray que nous sommes cy,
                        Nous mist hors du lieu obscurci,
20                    Par la mort dont Dieux vint a vie ?

                        Par qui fusmes nous secourus ?
                        Par la char Dieu qu’on achata,
                        Par la lance dont fut ferus,
                        Par le sang que Dieux degouta,
25                    Par la char dont Dieux s’esconsa
                        Ou corps de la vierge Marie,
                        Par la char que Dieux ot percie,
                        Par cellui qui en croix pandit,
                        Par le sang que Dieux espandit,
30                    Par la mort dont Dieux vint a vie.