Balade 144 : Qui veult terre de grant deduit savoir (CXLIV)

Autre Balade

                        Qui veult terre de grant deduit savoir,
                        Et ou droit cuer du royaume de France,
                        Et fortresce[1] de merveilleux povoir,
                        Haultes forests et estancs de plaisance,
5                      Aires d’oiseaulx, pars de belle ordonnance,
                        Ou pais de Vermendoys,
                        Devers Coucy acheminer te dois,
                        Lors des terres verras la nompareille :
                        Pour ce est son cri : Coucy a la merveille !

10                    Voy Saint Aubin ou il a beau manoir,
                        Aire a herons, ou maint faucon se lance,
                        A Foulambroy puet grant sires manoir,
                        Daims a ou parc qui moult vault de finance.
                        Eaues aussi, et que vault la puissance
15                    De la tour de Coucioys
                        Et du chastel, qui tant est lieux adrois ?
                        De Saint Gombain durement me merveille,
                        Pour ce est son cri : Coucy a la merveille !

                        Saint Lambert puet tout home recevoir
20                    Enmi l’estanc ou le poisson s’avance,
                        Le chastellain puet bien la chace avoir,
                        Lefere[2] est fort pour homme de vaillance,
                        Oyse l’ençaint, mais mettre en oublïance
                        Ne vueil Acy ceste fois
25                    Ne Gercies. Pour ce dist li bons Roys
                        Que de Coucy ne vit euvre pareille,
                        Pour [ce] est son cri : Coucy a la merveille !

[1] Ms. forteresce

[2] Saint Hilaire corrige en La Fere