Balade 143 : Depuis le temps que regnoit Saturnus (CXLIII)

Autre Balade

                        Depuis le temps que regnoit Saturnus,
                        Que Jupiter chaça en Lombardie,
                        Et que prinse fut par le roy Cyrrus
                        Babiloyne de quoy parle Ysaie,
5                      Et que Troie fut des Grieux envaye,
                        Ne de tous temps [dont] il puet souvenir
                        Ne fut veu, selon la prophecie,
                        Les merveilles qui sont a advenir.

                        Car passer doit a naige Lecadus[1]
10                    Qui par amours n’a amé Germanie,
                        Avec[ques] lui grant foison de ses dus.
                        Et relever se doit la paiennie.
                        Il doit regner une grant heresie,
                        Et Brutus doit de son royaume yssir
15                    Sanz retourner, car il n’espere mie                                                     32b
                        Les merveilles qui sont a advenir.

                        Mais encontr’eulx nagera Nepturnus,
                        Dieu de la mer, et l’aigle qui norrie
                        Par les poucins du saige Rocalus
20                    Doit obtenir en fin leur baronnie.
                        Ilz [les] vaincront, se Dieux leur donne vie,
                        Car oultre mer doit l’aigle conquerir,
                        Et achever par la saincte lignie
                        Les merveilles qui sont a advenir.

[1] Ms. Leceadus