Balade 142 : Prinsonnier est sanz cause et sanz raison (CXLII)

Balade

                        Prinsonnier est sanz cause et sanz raison
                        Mon las de cuer qui long temps l’a esté
                        Sanz avoir bien ne joieuse saison,
                        Fors que toudis languir en obscurté.
5                      Mon cuer s’en duelt qui sent toute griefté,                                        32a
                        Qui jadis seult vivre tresliement.
                        Or me voy serf en grant chetiveté
                        Sanz joie avoir, confort, n’esbatement.

                        Car logiéz suis en la triste maison
10                    De Justice qui m’a jeune maté.
                        Po m’y congnois, c’est ma destruction,
                        De pluseurs fault avoir l’inimistié.
                        Cessent[1] Amour et toute affinité,
                        Et a chascun rendre droit jugement :
15                    C’est de rigueur, Justice et Equité,
                        Sanz joie avoir, confort, n’esbatement.

                        Et se juges fait nulle mesprinson,
                        Combien qu’en ce n’ai point d’iniquité,
                        Appeléz yert ou menéz en prinson.
20                    Pour faire bien est souvent rebouté.
                        Juges languist en grant adversité,
                        Et j’ay aprins vivre joieusement :
                        Or languiray, se je n’en suis osté,
                        Sanz joie avoir, confort n’esbatement.

[1] Saint Hilaire corrige en cesser