Balade 140 : Long conseil, Orgueil et Envie (CXL)

Balade

                        Long conseil, Orgueil et Envie,
                        Grant Haine et petit Confort,
                        Grant Richesce d’autre partie,
                        Convoitise, qui chascun mort,
5                      Ont tant fait par leur grant effort
                        A l’aide d’Oultrecuidance,
                        Qu’ilz ont mis bien pres de la mort
                        Le noble royaume de France.

                        Qui deust faire une chevauchie
10                    Pour gaingnier ou chastel ou port,
                        Et que chascun deist : « Je l’octrie »,
                        S’advocas n’en fussent d’acort,
                        Il fausist que chascuns eust tort.
                        Et par tele perseverance
15                    Est au jour d’ui en desconfort
                        Le noble royaume de France.

                        Vous sçavéz bien que Bourgoisie
                        Et Noblesce fut en descort,
                        Et se firent mainte envaye.
20                    Mais l’en scet bien qui fut plus fort.
                        Et c’est ce qui, sanz nul ressort,                                                           31d
                        Avec trop petite deffense,
                        A fait perdre, si com j’ay sort,
                        Le noble royaume de France.