Balade 139 : Ou temps jadis des peres anciens (CXXXIX)

Autre Balade

                        Ou temps jadis des peres anciens
                        Fut Loiauté et Honeur regardee,
                        Les bons furent honouréz par leurs biens
                        Et les mauvais pugnis par juste espee.
5                      Mais au jour d’ui n’est Justice gardee
                        Ne Loyauté, fors qu’en dissimulant.
                        Cupido vit, Richesce est honouree,
                        Qui pert chevance, il pert esbatement.

                        Les loys fist [lors] li bons Justiniens,
10                    Pour le proufit de chascune contree,
                        Du bien commun sont de praticiens                                                    31c
                        En singulier dont chascun reversee :
                        Theologie petit aux clers agree,
                        Aux loys courent tuit pour gainger l’argent.
15                    Loyauté povre est partout reboutee,
                        Qui pert chevance, il pert esbatement.

                        Amours n’a lieu, car nulz ne feroit riens
                        S’il n’en avoit guerredon[1] ou souldee.
                        Les cuers avons plus moulz qu’Egipciens.
20                    Mal ressemblons la compaigne[2] Pompee
                        Qui combatit mainte dure journee
                        Pour le proufit commun tant seulement.
                        Honte nous suist, honeur s’en est alee :
                        Qui per chevance, il pert esbatement.

[1] Ms. guerdon

[2] Ms. compaignie