Balade 137 : Un sens te vueil aprandre et declairer (CXXXVII)

Balade

                        Un sens te vueil aprandre et declairer,
                        Or t’en vueille pour ton preu souvenir,
                        Que, se tu sers chevalier, n’escuier,
                        N’autre seigneur, bien ne t’en puet venir.
5                      Puis qu’il vueille tout prandre et retenir,
                        Apercevoir puéz que tu n’y faiz rien :
                        Saiges est cil qui puet vivre du sien.

                        Car puis qu’uns homs a son profit trop chier,
                        Et qu’il laisse le droit anientir
10                    De son servent, ou qu’il le fait lochier,
                        Couvertement et a lui convertir,
                        Tu te dois lors saigement departir.
                        En retraiant, ce mot glose et retien :
                        Saiges est cil qui puet vivre du sien.

15                    Tant com maistres se puet de toy aidier,
                        Tu es a lui : or pense du servir.
                        Mais s’en .iii. ans ne te faiz bien paier
                        Ne t’aten[1] plus qu’il te doie merir.
                        Et se griefté te fait au lit gesir,
20                    Tu es a toy, ja ne te fera bien :
                        Saiges est cil qui puet vivre du sien.

[1] Ms. naten