Balade 136 : Homme et bestes ont leurs condicions (CXXXVI)

Autre Balade

                        Homme[1] et bestes ont leurs condicions
                        Tressemblables certes en pluseurs cas.
                        Aucuns chiens veulent toutes destructions,
                        Et les autres sont pour mal faire au bas.
5                      L’un abaie, l’un pince et ne mort pas.
                        Asséz de gent sont de ceste maniere
                        Qui abaient et pincent par derriere.

                        Puis[2] qu’ilz mordent, n’est ce pas traisons
                        Quant par devant sont desconfiz et mas,
10                    Ostent aumuces, font inclinacions,
                        Offrent le leur et font feste de bras,
                        Et par derrier[3] pourchacent touz debas ?
                        Chascun doit bien telz gens bouter arriere
                        Qui abaient et pincent par derriere.                                                    31a

15                    Et quant ceuls voient leurs acusacions
                        Faittes ainsi, et leur felon pourchas,
                        Partie absent, ce fust drois et raisons
                        De dire a eulx : « Tes parlers soustendras
                        Devant partie, ou tu t’en desdiras. »
20                    Qui en fauldroit, n’eussent ceulx bonne chiere
                        Qui abaient et pincent par derriere.

[1] Ms. Hommes

[2] Ms. Et puis

[3] Ms. derriere