Balade 135 : Presente suis, je te viens faire aie (CXXXV)

Autre Balde de Nostre Dame

                        Presente suis, je te viens faire aie.                                                     30d
                        Mais il te fault mon filz, ton Dieu amer,
                        Et delaissier t’erreur et ta folie
                        Et ce monde qui te fait tourmenter.
5                      Pour .vii. tourmens qu’il convient rebouter,
                        Pran .vii. vertus qui font la vie monde,
                        Se ma pitié veulz que vers toy se fonde.

                        Humilité et Chasteté n’oublie
                        Et Charité, qui tant fait a louer.
10                    Abstinance soit en ta compaignie,
                        Pacience, pour touz maulx endurer.
                        De ton avoir doiz aux povres donner
                        Pour eschiver d’enfer la mort seconde,
                        Se ma pitié veulz vers toy que se fonde.

15                    Par ces vertus yert ta nef redrecie,
                        Et si pourras ton [voile] asseurer,
                        Ne les tourmens ne te mefferont mie
                        Que ne[1] puisses a droit port arriver.
                        Ton voile est droit, vueille toy ordener
20                    Si que peché en ton vaissel n’abonde,
                        Se ma pitiéz veulz que vers toy se fonde.

[1] Ms. tu ne