Balade 134 : Secouréz moy, douce vierge Marie (CXXXIV)

Balade de Nostre Dame moult belle

                        Secouréz moy, douce vierge Marie,
                        Port[1] de salut que l’en doit reclamer.
                        Je sens ma nef foible, povre et pourrie,
                        De sept tourmens assaillie en la mer.
5                      Mon voile est roupt, ancres n’y puet encrer.
                        J’ay grant paour que plunge ou [que n’]affonde
                        Se voz pitiéz envers moy ne se fonde.

                        Qui est la nef, fors ceste mortel[2] vie
                        Qui a paines puet .lx. ans passer ?
10                    Les sept tourmens sont Orgueil et Envie,
                        Detracccion, Luxure et Murmurer,
                        Convoitise qui ne laisse durer,
                        Et leurs consors me tuent en ce monde,
                        Se voz pitiéz envers moy ne se fonde.

15                    Mon voile est roupt, qui vertu signifie,
                        Et mon encre ne se puet arrester
                        Pour ce chetif monde qui me detrie,
                        Qui ne me laisse a mon ame penser.
                        Or me vueilléz mon voile relever,
20                    Vierge, ou je doubt pechiéz ne me confunde,
                        Se voz pitiéz envers moy ne se fonde.

[1] Ms. porte

[2] Ms. mortele