Balade 132 : Vous qui avéz pour passer vostre vie (CXXXII)

Balade

                        Vous qui avéz pour passer vostre vie
                        Qui chascun jour ne fait que defenir,
                        Vous vivéz frans sanz viande ravie.
                        Se du vostre vous povéz maintenir.
5                      Or vous vueilliéz du serf lien tenir
                        Ou pluseurs par convoitise
                        Ont perdu corps, esperit et franchise.
                        C’est de servir autrui, dont je me lasse :
                        Viellesce vient, guerdon fault, temps se passe.

10                    Car cil qui sert plus tost muert et devie
                        Que cilz qui peut fanchise retenir.
                        Pourquoy ? Pour ce que Mesdis et Envie
                        Regnent sur lui. Je l’ai veu advenir
                        En maintes cours. Par ce puis soustenir
15                    Que sil[1] fait folle entreprinse
                        Qui joie fuit et de dueil fait sa prinse :
                        Car en servant avec son corps qui casse,
                        Viellesce vient, guerdon fault, temps se passe.

                        Mais cilz qui vit du sien a chiere lie,
20                    Et qui se puet par son labour chevir,
                        Vit longuement et sanz merancolie
                        Et si se puet loyaument enrrichir
                        Sanz telz meschiefs ne telz paours souffrir.
                        Et pour ce quant je m’avise,
25                    Vueil Dieu servir et aler a l’esglise,
                        Vivre du mien, ne me chaut qui amasse :
                        Viellesce vient, guerdon fault, tempsse passe.

[1] Saint Hilaire corrige en cil