Balade 131 : Par la douçour de doulz nourrissement (CXXXI)

Autre Balade

                        Par la douçour de doulz nourrissement
                        S’aprivoisit mainte beste sauvage.
                        La domesche par dur gouvernement
                        S’asauvagist et mue son usage.
5                      L’un par douçour, [et] l’autre par oultrage
                        Que l’en leur fait changent condicion.
                        Ainsi est il, selon m’entencion,
                        En l’aage humain de mainte creature
                        Qui par douçour ou par contempcion
10                    Mue souvent et change sa nature.                                                      30a

                        Et je lui puis prouver tresclerement
                        Par les hommes qui ont franc arbitrage,
                        Qui par douçour muent communement,
                        Les muers d’un foul qui depuis devient saige,
15                    Et par durté maint ami de linaige
                        L’un de l’autre font separacion.
                        Douçour est donc grant consolacion
                        Qui cuers divers attraict par sa droicture,
                        Car maint chetif par sa provision
20                    Mue souvent et change sa nature.

                        Qui seignourir veult amiablement,
                        Et en grace tenir son heritaige,
                        De tel douçour doit gouverner sargent[1],
                        Non pas contr’eulx user divers[2] langaige,
25                    Eulx retranchier et soumettre : la raige[3]
                        Leur fait hair tel dominacion,
                        Le lieu fuir, et autre mension
                        Pour demourer querir par adventure.
                        [Et] c’est pour quoy aucuns sa nascion
30                    Mue souvent, et change de nature.

[1] Saint Hilaire corrige en sa gent

[2] Ms. de divers

[3] Ms. larrage