Balade 126 : Je voy l’estat de nature abregier (CXXVI)

Autre Balade 29a

                        Je voy l’estat de nature abregier
                        En l’aage humain, en toute beste mue,
                        Et la terre fait ses fruis a dangier,
                        Ses rappors sont de povre revenue.
5                      Consequamment tout font ou diminue,
                        De pou en pou va le secle a declin,
                        Charitéz fault et li uns l’autre tue,
                        Car li mondes est bien pres de sa fin.

                        L’aage doré commença au premier
10                    A noz peres, com de belle statue,
                        Et au second se prinst a empirer,
                        Car en argent tel aage se remue.
                        D’argent en fer li tiers aage inmue,
                        Et en arain le quart est nostre affin,
15                    Le cinq d’estain, plomc au[1] six s’esvertue,
                        Car li mondes est bien pres de sa fin.

                        En l’aage d’or vouldrent estudier :
                        Par eulx nous fut la science rendue,
                        Nostre ancien. Sanz la terre escorchier,
20                    Par.vii^c. ans fut leur vie veue,
                        Des loyaulx champs leur vie[2] soustenue,
                        N’onques l’un d’eulx ne[3] mua guerre a voisin.
                        Autrement va, et par ces poins j’argue,
                        Car li mondes est bien pres de sa fin.

[1] Ms. aux

[2] Ms. fut leur vie

[3] Saint Hilaire supprime ce mot