Balade 127 : Treschiers sires, vueilléz remercier (CXXVII)

Autre Balade

                        Treschiers sires, vueilléz remercier
                        L’art de musique et le gay sentement
                        Que Orpheus fist en vous commencier,
                        Dont vous estes honouriéz haultement :
5                      Car tous voz faiz moult honourablement
                        Chascuns reçoit en maint pais estrange,
                        Et si n’y a nul, a mon jugement,
                        Qui en die fors qu’a vostre louenge.

                        Les grans seigneurs, Guillaume, vous ont chier,                               29b
10                    En voz choses prannent esbatement.
                        Bien y parut a Bruges devant hier
                        A Monseigneur de Flandres proprement
                        Qui par sa main reçut benignement
                        Vostre Voir Dit a sellé dessur la range,
15                    Lire le fist. Mais n’est nul vraiement
                        Qui en fie fors qu’a vostre louenge.

                        Je lui baillié voz lettres en papier
                        Et vo[1] livre qu’il aime chierement.
                        Lire m’y faist, present maint chevalier.
20                    Si adresçay au lieu premierement
                        Ou Fortune parla si durement,
                        Comment l’un joint a ses biens, l’autre estrange.
                        De ce parlent, mais nulz n’en va parlant,
                        Qui en die fors qu’a vostre louenge.

[1] Ms. vostre