Balade 125 : Trop me merveil de ce monde present (CXXV)

Balade

                        Trop me merveil de ce monde present
                        Ou les aucuns sont si bien fortuné
                        Que sans sçavoir ni estre diligent
                        Ont riche estat et sont fort honouré.
5                      Et ceulx qui ont tout leur temps labouré
                        Et qui ont sens et diligence bonne
                        Sont soufraitteux et de dure heure né,
                        Car ilz ne sont remeris de personne.

                        Dont puet venir de ce le mouvement ?
10                    Est il [par Dieu] a chacun destiné
                        Que l’un ait bien, l’autre soit indigent ?
                        Certes, nenil. Mais Grace y a ouvré
                        Et Foul Plaisir : ce sont li dui degré
                        Dont maint coquart vont a la haulte bonne,
15                    Sanz lesquelz deux li bon sont tel mené,
                        Car ilz ne sont remeris de personne.

                        Et certes, c’est merveilleus jugement
                        En noble cuer que bon soit decliné
                        Par Foul Plaisir, dont tel grace descent
20                    Que le chetif est en hault eslevé.
                        Ignorance a ce plaisir alevé,
                        Tant qu’en mains lieux autre cloche ne sonne,
                        Contre les bons a trop perseveré,
                        Car ilz ne sont remeri de personne.