Balade 124 : O fleur des fleurs de toute melodie (CXXIV)

Autre Balade[1]

                        [O] fleur des fleurs de toute melodie,
                        Tresdoulz maistre qui tant fustes adrois,
                        O Guillaume, mondains dieux d’armonie,
                        Aprés voz faiz, qui obtendra le chois
5                      Sur tous faiseurs ? Certes, ne le congnoys.
                        Vo noms sera precieuse relique,
                        Car l’en plourra en France et en Artois
                        La mort Machaut, le noble rethorique.

                       La fons Circé et la fonteine Helie
10                    Dont vous estiéz le ruissel et les dois,
                        Ou poetes mistrent leur estudie
                        Convient taire, dont je suis moult destrois.
                        Las ! c’est par vous qui mort giséz tous frois,
                        Qui de tous chans avéz esté cantique.
15                    Plouréz, harpes et cors sarrazinois,
                        La mort Machaut, le noble rethorique.                                               28d

                        Rubebes, leuths, vielles, syphonie,
                        Psalterions, trestous instrumens coys,
                        Rothes, guiternes, flaustes, chamelie,
20                    Traversaines, et vous, nymphes de boys,
                        Tympanne aussi, mettéz en euvre dois,
                        Et le choro n’y ait nul qui replique[2],
                        Faictes devoir, plouréz, gentils Galois,
                        La mort Machaut, le noble rethorique.

[1] Balade sur les mêmes rimes et le même sujet que la précédente.

[2] Ms. le replique