Balade 123 : Armes, Amours, Dames, Chevalerie (CXXIII)

Balade pour Machaut

                        Armes, Amours, Dames, Chevalerie,
                        Clers, musicans, faititres en françois,
                        Tous sophistes, toute poeterie,
                        Tous ceuls qui ont melodieuse voix,
5                      Ceuls qui chantent en orgue aucune fois
                        Et qui ont chier le doulz art de musique,                                         [28c]
                        Demenéz dueil, plouréz, car c’est bien drois,
                        La Mort Machaut, le noble rhetorique.

                        Onques d’amours ne parla en folie,
10                    Ains a esté en tous es diz courtois,
                        Aussi a moult pleu sa chanterie
                        Aux grans seigneurs, a Dames et bourgois[1].
                        Hé ! Orpheus, asséz lamenter dois
                        Et regreter d’un regart authentique,
15                    Arethusa et Alpheus, tous trois,
                        La Mort Machaut, le noble rhetorique.

                        Priéz pour lui, si que nul ne l’oublie :
                        Ce vous requiert le bailli de Valoys,
                        Car il n’en est au jour d’ui nul en vie
20                    Tel comme il fut, ne ne sera des mois.
                        Complains sera de princes et de Roys,
                        Jusqu’a longtemps pour sa bonne pratique.
                        Vestéz vous noir, plouréz tous, Champenois,
                        La Mort Machaut, le noble rhetorique.

[1] Ms. a bourgois