Balade 122 : Je ne doubte qu’Envie et Traison (CXXII)

Balade

                        Je ne doubte qu’Envie et Traison
                        Qui vont a court pour moy nuire et grever
                        A mon desceu. Mais s’ilz treuvent Raison
                        Riens ne croira sanz moy faire appeler.
5                      Se present suit, ilz n’oseront jangler,
                        Car en touz cas garderay mon honeur.
                        Et s’ilz me heent, a tout considerer,
                        C’est pour garder le droit de mon seigneur.

                        Mais toudis est Loyauté en saison
10                    Qui se deffent en guise de sangler :
                        Tousjours loial vueil garder sa maison
                        Et Justice, sanz riens dissimuler.
                        C’est ce qui fait contre moy murmurer,
                        Ne Traison n’y scet autre coulour.
15                    Envie bruit, qui me veult diffamer,
                        C’est pour garder le bien de mon seigneur.

                        Pour ce supplie en ma conclusion
                        Au souverain qui tous faiz doit peser,
                        Qu’il ne se meuve par[1] indignacion
20                    Pour l’accusant, sanz partie escouter :
                        Faulx rapporter doit sires rebouter
                        Et le mauvais pugnir de sa rigueur.
                        Mais s’innocent me fault pour ce endurer,
                        C’est pour garder le droit de mon seigneur.

[1] Saint Hilaire corrige en en