Balade 121 : De tous les biens temporelz de ce monde (CXXI)
Balade
De tous les biens temporelz de ce monde
Ne s’i doit nulz Roys ne sires clamer,
Puisque telz sont[1] que Fortune suronde
Qui par force les puet touldre ou embler.
5 Le plus puissant puet l’autre deserter,
Si qu’il n’est Roy, duc, n’empereur de Romme
Qui en terre puist vray tiltre occuper,
Ne dire sien, fors que le sens de l’omme.
Veoir [le] puet chascun a la reonde
10 En pluseurs cas. Soit en terre ou en mer,
Tant par guerre, ou convoiteux sefonde,
Comme autrement, voit l’en estat muer,
Riche apovrir, et le povre eslever,
Le fort ravir qui le plus assomme ;
15 Si ne doit nulz telz biens attribuer
Ne dire sien fors que le sens de l’omme
Mais par bon sens ou science profonde,
Que l’en ne puet a creature oster,
Se puet chascun maintenir net et monde
20 Et en touz lieux saigement gouverner.
Si puis par ce conclure et vueil prouver
Qu’es biens mondains n’a vaillant une pomme.
Homs, quel qu’il soit, [dont] ne se doit vanter,
Ne dire sien fors que le sens de l’omme. 28b
[1] Ms. font
