Balade 120 : Nul ne se doit pour grant estracion (CXX)

Autre Balade

                        Nul ne se doit pour grant estracion,
                        Pour grant sçavoir, pour avoir, pour puissance
                        Enorgueillir, n’avoir presumpcion
                        De trop valoir, n’estre plains de bobance :
5                      Car [un] chascun voit par experience
                        Que telz est hui fors, legiers et appers,
                        C’un po de fievre met[1] en tel balance
                        Qu’en le[2] juge viande pour les vers.

                        Je[3] suppose que de complection
10                    Fust le meilleur, et de mieudre abstinance
                        Qu’en puist rouver, sa generacion
                        Doit toutefoiz avoir en remembrance,
                        Comment il naist a dueil et a pensance,
                        Trespovrement, plus que biches ne sers,
15                    Et que sitost qu’il a mal ou grevance,
                        Qu’en le juge viande pour les vers.                                                     28a

                        A bien faire doit son entencion
                        Mettre du tout cilz qui a congnoissance,
                        Car ce monde n’est que transaction
20                    De tout travail et de toute meschance.
                        Hair le doit cilz qui a conscience,
                        Car li mondes est traistres cuvers,
                        L’ame murdrist, le corps trait si et lance
                        Qu’en le juge viande pour les vers.

[1] Ms. le met

[2] Ms. lui

[3] Ms. Et je