Balade 119 : Il me semble, qui bien s’aviseroit (CXIX)

Balade

                        Il me semble, qui bien s’aviseroit
                        Des biens mondains, terriens n’auroit cure,
                        Ainçois du tout iceulx relenquiroit.                                                     27d
                        Car Salomon tesmoingne en l’escripture,
5                      (Qui ot le sens sur tout creature
                        Et tous delis jusqu’a infinité),
                        Qu’en ce monde n’a fors que Vanité.

                        Il planta vigne ou temps que il vivoit,
                        Il fist palais, jardins plains de verdure,
10                    Il ot estancs, boys et quanqu’il vouloit,
                        Bugles, chamaulx et autre nourreture,
                        Chiens et oiseaulx, tous deduiz de nature,
                        Et nonpourquant dist il en verité,
                        Qu’en ce monde n’a [fors] que Vanité.

15                    Helas, chetis ! qui bien se mireroit
                        En son parler, se secle n’est qu’ordure.
                        Mauvaisement jamais riens n’acquerroit
                        Pour la mortel charongne qui po dure,
                        Ainçois vivroit de vie amere et dure
20                    Pour faire vivre l’ame en eternité :
                        Qu’en ce monde n’a fors que Vanité.