Balade 118 : Porte d’enfer, destruccion de corps (CXVIII)
Autre Balade
Porte d’enfer, destruccion de corps,
Langueur de mort, abregement de vie,
Mue en peril, haines et descors,
En Beau Semblant Traison et Envie,
5 Luxure, Orgueil, Paresce et Glotonnie, 27c
De tous pechiéz le chastel perilleux,
Tour et retrait des hommes convoiteux,
Le droit palaiz et hostel de fortune,
Mondaine court, qui faiz les dolereux,
10 Fuir te doit un chascun et chascune.
Car par deliz attraiz gens et amors,
En promettant estat et seignourie.
La s’endorment. Leur temps se passe lors,
Vieillesce vient, l’un rit et l’autre crie.
15 Paine n’y est a nul homme merie
Selon raison. Plus a le pareceux
Que diligens : mais en y a de ceulx
Qui ont trouvé ceste chose commune.
Et puisqu’on voit ton fait ainsi doubteux,
20 Fuir te doit un chascun et chascune.
Qui grace y a, il est pincéz et mors
De maintes gens. Qui grans est, qu’on l’escrie.
S’il a argent, il fault qu’il soit retors.
Se povres est, il languist en partie.
25 Chose n’y a qui soit bien departie.
L’en ne congnoist la nul cuer vertueux,
Car Foul Plaisir, le malaventureux,
Donne son cuer puis a l’un, puis a l’une.
Et quant ton fait est si maugracieux,
30 Fuir te doit un chascun et chascune.
L’envoy
Mondaine court, de toy bien me recors,
Ains ne te vy fors doubteuse et enfrune.
Que saiges est ait en les .ii. piéz hors,
Fuir te doit un chascun et chascune.
