Balade 117 : Las ! je ne sçay de quoy sert Jalousie (CXVII)
Autre Balade
Las ! je ne sçay de quoy sert Jalousie
On ne la doit [ne] craimdre ne nommer,
Car d’Amour vient. Or voy qu’on n’aime mie,
Ne nulz ne veult plus aprandre a amer.
5 Ou nom d’amer voy souvent trop d’amer.
Qui aime a droit, Jalousie le maine.
Or n’aime nulz fors d’Amour fausse et vaine. 27b
Jalousie n’est pas donc en saison
Puis qu’Amour faut, ce est[1] chose certaine :
10 Soubz nom d’amer se tapist Traison,
Qui avec lui maine tous temps Envie.
Celle lui fait venir Dissimuler,
Et Faulz Semblant use avec eux sa vie,
Qui des bouches fait yssir Doulz Parler.
15 Soubz nom d’ami fait Haine avaler,
Les bras au coul son ami noier maine.
Dieu, quele Amour tissu de fausse laine,
Qui es faulx cuers a sa propre maison
Et main palais ! chascun jour et sepmaine
20 Soubz nom d’amer se tapist Traison.
Convoitise a toute chose honnie,
Car nulz ne tent qu’a richesse amasser.
Joie, deduit et leesce est perie,
Pitié, Honeur ne se puent[2] trouver,
25 Et qui voirs[3] est, sur lui fault controuver,
Afin qu’il ait perte, dommaige et paine.
Car un chascun de mal faire se paine.
Amour n’a lieu, Verité ne Raison.
Vices regnent. Vertus n’ont nul demaine,
30 Soubz nom d’amer se tapist Traison.
L’envoy
Princes, je voy toute chose mondaine,
En voulenté et en confusion,
Et qui pis est, qui n’est pas chose vaine,
Soubz nom d’amer se tapist Traison.
[1] Ms. cest
[2] Saint Hilaire corrige en pueent
[3] Ms. vous
