Balade 116 : En mon vergier et en ma pommeroie (CXVI)
Autre Balade
En mon vergier et en ma pommeroie
N’avoit d’antes ne mez un seul pommier,
Ou fruit duquel tout mon espoir avoie,
Et qu’il deust pour moy fructifier, 27a
5 Car il crut fort et flouri au premier,
Et me monstra tresgrant signe de bien
En estendant ses raims et son merrien,
Et demonstrant de moy faire plaisance.
Mais lui parfait ne me rapporta rien :
10 Nulz ne se doit fier en apparance.
Quant antéz fut, chascun jour le veoie
Croistre a souhait et ses branches drecier.
Au cultiver de vray cuer labouroie
En esperant du fruit avoir loier.
15 Mais, lui parfait, le me voult devoier,
Aux estranges de ce fruit disoit : « Tien. »
Se saiges es, ce prouverbe retien :
En jeune plant ne te fie d’enfance,
Se beaus appert. Car au fort, saiches bien,
20 Nulz ne se doit fier en apparance.
Pour ce jamais, en quelque lieu que soie,
A plant nouvel ne me vueil traveillier.
Perdu y ay temps, ans, labour et joie.
Je prise mieulx un ancien perier,
25 Car de son fruit aray au derrenier.
Mais plant nouvel n’est pas saint Julien,
Il se fait bon garder de son lien,
Et qu’om n’y ait pas toute s’esperance.
Car de son fruit suis vray experien :
30 Nulz ne se doit fier en apparence.
