Balade 115 : Trop de gent sont qui honourent l’abit (CXV)
Balade
Trop de gent sont qui honourent l’abit
Et au corps font pour robe reverence,
Et ne tiennent compte de l’esperit
De cil qui a bonnes meurs et science.
5 Et n’ont regart a la sufficience 26d
Du corps, s’il n’est paréz de riches draps.
Combien que tel vest robe de bourras,
Ou la porte cointe et intercisee,
Qui plus a sens qu’en telz est advocas :
10 On ne congnoist aux robes la pensee.
L’entendement et la voulenté fist
Dieu des hommes forméz a sa semblance.
Nuz les crea et puis l’ame leur mist
Ou chetif corps, sanz faire difference
15 De nul qui soit au naistre n’en semence.
Les grans robes saiges ne les font pas,
Ne fos aussi. Riens n’y font en ce cas
Povres habiz, fors sicence approucee,
Sens naturel, et le bien faire : helas !
20 On ne congnoist aux robes la pensee.
Les Apostres ne le doulz Jhesu Crist
Ne porterent draps de grant apparance,
Mais leurs vertus furent de grant proufit
Qui ont partout donné bonne creance.
25 Robes de vair ne de gris n’ont puissance
D’assagir nul. Mais puis que le sens as,
Se robes vests[1] pour ce ne le perdras.
Foulz sa fleur pour sa robe herminee
Ne laissera, ne son sens l’omme bas :
30 On le congnoist aux robes la pensee.
L’envoy
Prince, n’aiéz nul saige homme en despit,
Se grant estat n’a ou robe fourree,
Car tel scet moult qui est povre et petit :
On ne congnoist aux robes la pensee.
[1] Ms. vestus
