Balade 114 : Dix et sept ans ay au Sathan servi (CXIV)
Autre Balade
Dix et sept ans ay au Sathan servi,
Au monde aussi et a la char pourrie,
Oublié Dieu et mon corps asservi
A celle court de tout vice nourrie.
5 La est orgueil, luxure et glotonnie,
Convoitise, mentir, detraction, 26c
Omicide, larrecin, traison
Envie grant, lascheté et paresce.
C’est l’entr’e de l’infernal maison :
10 Foulz la poursuit et saiges la delesse.
Trop pou de gens sainctifier y vi
De tout mon temps. Chascun s’ame y oublie.
Par vanité y sont maint cuer ravi
Gastans leurs corps, cuidans, ce que n’est mie,
15 Guerdon avoir. Ami n’y a n’amie,
Congnoissance, diligence, raison,
Maniere, senz, honeur, discrecion,
Preudomnie, loyauté ne prouesce,
Fors Foul Plaisir. La est sa mansion :
20 Foulz la poursuit et saiges la delesse.
Car en servent y sont maint envieilli
Sanz bien avoir, leur chevance ont perie,
Dieu delaissié, l’espoir leur est failli
D’avoir guerdon : tel court est, foulz s’i fie.
25 L’ame s’en duelt : a ! com dolente vie
Delaissier Dieu en congregacion
De telz pechiéz ! c’est la destruction
D’ame et de corps. adieu, court, je te lesse :
Trop m’as tenu. Et, pour conclusion,
30 Foulz la poursuit et saiges la delesse.
L’envoy
O curial, tant [pleine] es[t] court d’envie
Et de tourment, qui d’acroistre ne cesse,
Que dire puis partout sanz villenie :
Foulz la poursuit et saiges la delesse.
