Balade 111 : Tous les regnes qui n’ont craimt et doubté (CXI)

Balade

                        Tous les regnes qui n’ont craimt et doubté
                        Le createur du ciel et de la terre,
                        Et qui se sont par orgueil ahurté                                                         25d
                        A leur vouloir, sanz s’aide requerre
5                      Et n’ont voulu raison, justice querre,
                        Sont translatéz et en perdicion.
                        Savoir le puet qui en vouldra enquerre :
                        Tesmoing Troies, Thebes, Romme, Ylion.

                        Ceuls d’Israel esclave et tourmenté
10                    Par leur pechié furent mis soubz[1] la terre
                        De Pharaon, et illec transporté,
                        Faisant labours comme chetis qui erre.
                        Dieu congnurent qui de la les desserre
                        Quant il perçut leur grant affliction.
15                    Mais ou droit fault, l’en en puet paix acquerre :
                        Tesmoing Troies, Thebes, Romme, Ylion.

                        Pour quoy furent ly Rommain surmonté,
                        Qui le monde soubmistrent tuit par guerre ?
                        Par leur orgueil, par leur iniquité
24                    Qui les firent a leurs subgiz conquerre.
                        Qui Dieu ne craimt, c’un coup n’a ne c’un voirre,
                        Aler le fault en desolacion.
                        Par orgueil Dieu tout prince ainsi desserre :
                        Tesmoing Troies, Thebes, Romme, Ylion.

                        L’envoy

25                    Princes, nulz homs ne doit estre vouté
                        Es tenenbres de folle opinion.
                        Qui Dieux ne craimt, il est plus qu’assoté :
                        Tesmoing Troies, Thebes, Romme, Ylion.

[1] Saint Hilaire corrige en en