Balade 110 : Avant que Loy fust par Droit ordonnee (CX)
Autre Balade
Avant que Loy fust par Droit ordonnee, 25c
Vivoit chascuns en franchise commune.
Nature estoit lors si franche donnee
Que par Amours amoit chascuns chascune,
5 Et se gardoit de faire desplaisir
L’un a l’autre. Chascuns avoit plaisir
De soy monstrer vray ami et amie,
Pour la doubte de l’amour departir :
Ainsi fist on, mais on ne le fait mie.
10 Car puis qu’il fut espoux et espousee,
Amour devint de touz poins pale et brune,
Pour les sermens et la loy destinee
Qui le souleil fist muer en la lune,
Quant celle loy fait l’omme seignourir,
15 Et la clarté d’Amour perdre et perir
Qui onques jour n’ama bien seignourie,
Que les frans cuers souloient conjouir :
Ainsi fist on, mais on ne le fait mie.
S’en est Amour toute desesperee.
20 Franchise muert qui est des dames l’une
Qui par douçour est de touz esperee.
Mais ceste loy [est] en amour enfrune
Qui par force fait de loy[1] obeir
Cil qui avant vouloit amours servir.
25 Et par ainsis est amour asservie
Par loy qui veult nature anientir :
Ainsi fist on, mais on ne le fait mie.
L’envoy
Prince, Amour veult equalité tenir,
Amer c’om l’aimt franchement, et non mie
30 L’amaistrier. Chascun ait son desir.
Ainsi fist on, mais on ne le fait mie.
[1] Saint Hilaire corrige en de loy fait
