Balade 109 : Joustes, tournois, luttes et bouhourdis (CIX)

Autre Balade

                        Joustes, tournois, luttes [et] bouhourdis,
                        Pierre jetter, les escuz, l’escremie
                        Acoustuméz des Anciens jadis,
                        En temps de pais furent, n’en doubtéz mie,
5                      Pour exercer fait de chevaleire,
                        Chacer, voler : pour ce, se temps de guerre
                        Leur retournast, qu’ils sceussent l’envaye,
                        Et en tous cas leurs ennemis requerre.

                        Et ne feussent lasches n’engourdelis,
10                    Mais fors et preux, et, a chiere hardie,
                        Receussent leurs guerreeurs toudis,
                        Sanz trop avoir fait des rames l’oublie.
                        Ceuls d’Athenes et [ceulx] de Rommenie
                        Firent entr’eulx ainsi pour los acquerre,
15                    Et aloient, touz les jours de leur vie
                        Et en tous cas, leurs ennemis requerre.

                        Par ce ne fault, a ceulx qui sont requis
                        Et qui guerre ont, chacer ne volerie,
                        Dancer, jouster ne querre leurs delis,
20                    C’om le tiendroit en tous lieux a folie.
                        Princes garder leur peuple a chiere lie
                        Doivent sur tout, et chacer de leur terre
                        A leur pouoir et par leur seignourie
                        Et en tous cas leurs ennemis requerre.

                        L’envoy

25                    Princes jamais ne soient ententis,
                        Puis que guerre ont, fors [que] d’onnour acquerre,
                        Voisent com preux cerchier leurs ennemis,
                        Et en tous cas leurs ennemis requerre.