Balade 107 : Quant element sont en conclusion (CVII)

Balade

                        Quant element sont en conclusion
                        De ce monde mettre a fin dolereuse,
                        Pour noz pechiéz, pour no pugnicion,
                        Pour nostre orgueil et vie convoiteuse,
5                      Et pour la loy sainctisme et glorieuse
                        Que nulz ne craimt, mais la destruit et mine,
                        Chascuns mauvais suit[1] sentence doubteuse :
                        Mortalité, tempest, guerre et famine.

                        Prophecie est et constellacion,
10                    Et loy de Dieu, justice non crueuse,
                        (Levitique fait de ce mencion),
                        Aux bons promet tout bien, vie joieuse
                        Et aux mauvais dolente et paoureuse
                        Qui ses commans ne gardent a la ligne.
15                    A telle gent donrra maleureuse
                        Mortalité, tempest, guerre et famine,

                        Dont nous veons la preparacion :
                        L’air nous esmuet guerre tresmerveilleuse,
                        Tempest aussi et l’inundacion,
20                    Famine grant et la terre plugeuse.
                        Ne germera que chose perileuse                                                         25a
                        Dont les vivans mourront en brief termine.
                        Ainsis la fin amainent haineuse
                        Mortalité, tempest, guerre et famine.

                        L’envoy

25                    Prince, je tiens selon m’opinion
                        Que se pitié vers Dieu noz cuers n’encline,
                        Que du monde feront finicion
                        Mortalité, tempest, guerre et famine.

[1] Ms. ensuit