Balade 106 : Qui puet vivre de son loial labour (CVI)

Balade

                        Qui puet vivre de son loial labour,
                        De l’art qu’il a, ou de sa revenue
                        Sans exceder, il vit a grand honour,
                        Car sa vie est de tous bonne tenue,
5                      Puis qu’il ne toult, qu’il ne ravit ou tue
                        Et que tousjours a loyaulté s’adresce,
                        N’aquiere ja chevance malostrue :
                        Mieulx vault honeur que honteuse richesce.

                        Car riche faulx n’a fors que deshonour,
10                    En un moment est sa terre perdue,
                        Et ses pechiéz fait muer sa coulour,
                        Que l’en perçoit sa grant desconvenue.
                        Il n’ose aler teste levee et nue
                        Pour son meffait, ainz vers terre s’apresse,
15                    Mas et honteus comme une beste mue :
                        Mieulx vault honnour que [honteuse] richesce.

                        Car puis qu’uns homs ara fait un faulx tour
                        Monstréz sera au doit parmi la rue.
                        Et lors ne fait que querir un destour
20                    Pour lui mucier, car son pechié l’argue.
                        Povres loyaulx tient son chief vers la nue,
                        Homme ne craint, car honte ne le blesce.
                        Ceste chose soit de tous retenue :
                        Mieulz vault honeur que [honteuse] richesce.

                        L’envoy

25                    Princes, prodoms puet de nuit et de jour
                        Aler partout. Sa teste lieve et dresce.
                        Mais desloiaulx ne quiert que tenebrour :
                        Mieulx vault honour que [honteuse] richesce.