Balade 104 : Qui connoistroit les grans labours mondains (CIV)

Balade            24b

                        Qui connoistroit les grans labours mondains
                        Et les perilz qui sont es grans estas,
                        Les granz pechiéz dont li mondes est plains,
                        Et l’aage brief incertain en tous cas,
5                      Les envies, tristesces et debas
                        Que les bons ont, la paine et le tourment
                        Deu au mauvais, il requerroit embas
                        Grace de Dieu, vivre, et son vestement.

                        Mais au jour d’ui li linages humains
10                    Ne desire fors richesces a tas,
                        Monter en hault, tout tenir en ses mains,
                        Estre honouré, et ne regarde pas
                        Qu’a coup soudain Fortune le fait cas,
                        Et de hault chiet trop perilleusement.
15                    Regardons cy. Chascun souffise, helas !
                        Grace de Dieu, vivre et son vestement.

                        Homs, enten ci, et soies tout certains
                        Que plus vray n’est de ce que tu mourras.
                        Renom, guerdon[1], nul n’a plus, mais bien mains.
20                    Renom aux hoirs, guerdon[2] emporteras
                        Se tu faiz bien. Par mal te dampneras :
                        Pran le meilleur et vi moiennement.
                        Souffre doit a chascun, sil n’est las,
                        Grace de Dieu, vivre, et son vestement

[1] Ms. guerredon

[2] Ms. guerredon