Balade 102 : Trop esjouir, ne trop desconforter (CII)

Balade

                        Trop esjouir, ne trop desconforter
                        Ne se doit homs pour chose qu’il aviengne,
                        Mais doit tous cas trescontamment porter.
                        Du bien n’esjouit, ne du mal ne se plaingne,
5                      Car Fortune, qui a en son demaine
                        Les cas soudains, mue soudainement
                        Leesse en plour, et dueil en joie maine :
                        Ainsi le voit chascuns communement.

                        Ne nulz ne puet ce monde conquester,
10                    Ny tenir sien nulle chose certaine,
                        Se plus puissans lui veult touldre et oster.
                        Et s’est tele la fortune mondaine
                        Que nulz n’y a riens sanz traveil et paine.
                        Mais au garder fault bon gouverment,
15                    Sens advis, pour fortune soudaine :
                        Ainsi le voit chascun communement.                                                 24a

                        Des œuvres doit homs la fin regarder,
                        Paravant ce que nulle chose emprangne[1],
                        Qu’il ait cause de son fait achever,
20                    Qu’il tende a bien, que de Dieu lui souviengne[2].
                        Se mal lui vient, com le bien en gré prangne[3],
                        Et bien et mal porte ensemble egaument :
                        Homs confortéz vaint fortune invertaine,
                        Ainsi le voit chascun communement.

[1] Saint Hilaire corrige en empraingne

[2] Saint Hilaire corrige en souvieingne

[3] Saint Hilaire corrige en praingne