Balade 101 : Au souverain (c’est Dieu, qui tout crea) (CI)

Balade

                        Au souverain (c’est Dieu, qui tout crea)
                        Requiert Pité et supplie humblement
                        Que trois choses qui ne sont par deça
                        Vueille envoier pour bon gouvernement :
5                      Congnoissance qui fault premierement,
                        Et Verité qui ne s’ose apparoir,
                        Et Justice qui se faint laidement,
                        Dont bons ne puet au monde bien avoir.

                        Car qui ces trois en cest estat tendra,
10                    Consideré que Janglerie ment,
                        Et que ja bons essauciéz ne sera,                                                        23d
                        Ne Verité congneue proprement,
                        Ne Justice ne fera justement,
                        Lors verréz vous toute honeur remouvoir
15                    Et inmuer le cours du firmament,
                        Dont bons ne puet au monde bien avoir.

                        Beneis soit donc qui si regardera.
                        Tu, Roy des Rois, donne l’entendement
                        D’avoir ces trois qui avoir les vouldra.
20                    A un chascun qui fera autrement,
                        Tout perira par ton droit jugement.
                        L’en en voit ja les vraiz signes paroir,
                        Car les pecheurs regnent communement,
                        Dont bons ne puet au monde bien avoir.

                        L’envoy

25                    Prince des cieuls, je voy tout clerement
                        Que mains faignent et n’osent dire voir,
                        Pour la paour de paine et du tourment,
                        Dont bons ne puet au monde bien avoir.