Balade 99 : Améz les bons, donnéz au soufraitteus (XCIX)
Balade
Améz les bons, donnéz au soufraitteus,
Soiéz larges ou il appartendra,
Durs aux mauvais et aux povres piteus,
Et restraingnéz quant temps le requerra.
5 Saichéz a qui vostre don se fera
Et se cilz a desservi pour l’avoir.
Du bien commun faictes vostre devoir :
A ce devriéz sur toutes choses tendre,
Car tous ces poins fist jadis assavoir
10 Aristote au grant roy Alixandre.
De Dieu soiéz en tous temps cremeteus,
Améz, servéz, et il vous secourra.
Gardéz la loy et justice a tous ceuls
Et a cellui qui contre offensera
15 Sanz espargnier. Chascun vous doubtera.
Ne convoitiéz de voz subgiéz l’avoir, 23b
Vo parlers soit toudis trouvé en voir,
Faictes au grans et petiz leur droit rendre.
Car tous ces poinz fist jadis assavoir
20 Aristote au grant roy Alixandre.
Encor lui dist : « Ne soies pareceus,
Mais diligens quant il le convendra.
Saiges tenéz anciens et les preus
En chascun art, et ce vous aidera
25 A gouverner, si que nul ne pourra
Vostre regne grever ne decevoir.
Vous, voz subgiéz ferés riches d’avoir
Et de bon nom que chascuns homs doit prandre »,
Car tous ces poins fist jadis assavoir
30 Aristote au grant roy Alixandre.
L’envoy
Princes, ces poins tint cilz Roy et ama,
Qui tout le monde obtint et subjuga
Et d’ensuir les vertus fut vray hoir.
Si devéz bien, pour vous faire valoir
35 Et vo renom, telz paroules entendre,
Car tous ces poins fist jadis assavoir
Aristote au grant roy Alixandre.
