Balade 98 : Depuis le temps du grant Hermogenés (XCVIII)
Autre Balade
Depuis le temps du grant Hermogenés
Qui saiges clers fut en philosophie,
De Virgile, Platin, Dyogenés,
De Philemon qui ont grant estudie,
5 Et d’Ypocras jugens phillosomie,
Et du prince souverain phillosophe
Qu’Alixandres appelloit Aristote,
En nature ne fut si grant estrif
Comme a present, ne si dure riote :
10 Car chascun fault prandre un restraintif.
Pour ce que trop ont fait les corps d’excés,
Le temps passé, et de gourmenderie,
Et se sont fait servir de trop de mes,
Dont encouru ont mainte maladie :
15 Les uns vuidier a fallu en partie,
Autres serrer. L’un meurt et l’autre assote,
Mais languereus en sont en tele flote 23a
Qui pas queru n’ont leur confortatif,
Creu les expers, dont ventre si leur flote,
20 Car chascun faut prandre un restraintif.
Les viandes et ces grans delis fes
Puis comparer a mainte seignourie,
Et aux prelas atout leurs grans bufés,
[Aux] officiers, a la chevalerie
25 Aux serviteurs qui ont par leur folie
Prins grans estas, de quoy maint saige moque.
Laissier leur fault, et prandre tel[e] cote
Qu’avoir devront, ou ilz seront chetif.
Necessité leur fait oir tel note,
30 Car chascun fault prandre un restraintif.
L’envoy
Princes, mieulx vault encor tart que jamais
En son grant mal prandre un mitigatif,
Pour moins grever son ame et ses subgiés.
Car chascun fault prandre un restraintif.
