Balade 97 : Je ne finay depuis longtemps (XCVII)

Balade

                        Je ne finay depuis longtemps
                        De ramentevoir les vertus,
                        Des vices blamer, et les sens
                        De mon pouoir remettre sus :
5                      Et lors vint a moy un bossus
                        Qui me dit : Dieu gart le varlet
                        Qui prant les asnes a la glus !
                        Tu bas bien l’eaue d’un pilet.

                        ― Veulz tu du doy arer les champs ?
10                    Veulz tu planter bois de festus ?
                        Au cul de l’asne fais tes chans.
                        Tu bas foit fer, tu[1] es deçus.                                                                 22d
                        Tu chantes comme li cucus
                        Qui s’estonne et gaste son plet.
15                    Tois toy, des or ne chante plus :
                        Tu bas bien l’eaue d’un pilet.

                        Veuls tu faire loups[2] innocens
                        Et que les eufs soient velus ?
                        Veulz tu les petis faire grans
20                    Et les saiges des malostrus ?
                        Parle, tes parlers est perdus,
                        Autant vault le vent d’un souflet.
                        L’en t’oit bien, c’est tout. Si conclus :
                        Tu l’a bien l’eaue d’un pilet.

                        L’envoy

25                    Princes, quant cilz la se fut teus,
                        Et j’oy bien pensé a mon fet,
                        Vray il me[3] dist, et bien congnus :
                        Tu bas bien l’eaue d’un pilet.

[1] Ms. ou tu

[2] Ms. les loups

[3] Ms. lue