Balade 96 : Humilité, Honnour, Largesce (XCVI)

Balade

                        Humilité, Honnour, Largesce,
                        Senz, Loyaulté et Prodommie,
                        Vertu, Congnoissance, Prouesce,
                        Amour, Pitié et Saincte Vie,
5                      Craimte de Dieu, et Seignourie
                        Furent jadis es anciens.
                        Souffisance leur fut amie,                                                                     22c
                        Et pour ce eurent ilz pluseurs biens.

                        L’Eglise fut en grant hautesce,
10                    Le Peuple ne s’orgueillit mie,
                        Pour ces deux combatoit Noblesce,
                        En lui n’avoit lors Tirannie.
                        Li uns n’avoit sur l’autre envie,
                        L’on ne pilloit ne tuoit riens,
15                    Entr’eulx fut Justice establie,
                        Et pour ce eurent ilz pluseurs biens.

                        Or voy Deshonour et Paresce,
                        Traison regner et Boidie,
                        Convoitise la larronesse,
20                    Descongnoissance et Menterie,
                        Desloyauté, Barat, Folie,
                        Haine entre les Crestiens.
                        Les bons tindrent meilleur partie :
                        Et pour ce eurent ilz pluseurs biens.