Balade 95 : Quant uns homs a jeunes esté (XCV)

Balade

                        Quant uns homs a jeunes esté                                                            22b
                        Et la vieillesce le sousprant,
                        Lors, pour son ancienneté,
                        Devient moins qu’en estat d’enfant.
5                      Et assoté, legierement
                        Toudis parle, sanz vray propos,
                        Et s’en va ainsi deffinent :
                        Je ne voy que foles et folz.

                        Le monde a la proprieté
10                    De ce vieillart : trop innocent
                        Fut aprés sa nativité,
                        Et puis fut saiges longuement,
                        Justicier, vertueus, vaillant.
                        Or est lasches, chetis et molz,
15                    Vieulx, convoiteus et mal parlant :
                        Je ne voy que foles et folz.

                        La fin s’approuche, en verité,
                        De tout aage et chose vivant.
                        Le sens n’a nulle auttorité,
20                    Mais sotie est bien apparant :
                        Car chascun pour son plaisir prant
                        Et veult avoir sotes et sos.
                        Tout va mal : pour ce, en concluant,
                        Je ne voy que foles et folz.

                        L’envoy

25                    Princes, qui a saiges hanté
                        Et les vaillans, bien dire l’os,
                        Laissier doit tel chetiveté :
                        Je ne voy que foles et folz.