Balade 94 : Arbres d’orgueil, plante d’iniquité (XCIV)
Autre Balade
Arbres d’orgueil, plante d’iniquité
Et racine de toute traison,
Franches aussi de toute fausseté, 22a
Fueilles, fleur, fruit de contradicion
5 Cause, moment de grant rebellion,
De Canaam, Caym et Judas nee,
D’eresie contre Dieu forsenee,
Ingrate en tout que Lucifer atent,
Dieux contre toy a sentence donnee :
10 Avise toy, fausse ville de Gand.
Contre ton Dieu pour l’intrux as esté,
Contre ton Roy fait conspiracion,
Ne tu n’as pas ton droit seigneur doubté
Duquel tu dois estre en subjection.
15 Corps, ville et biens en confiscacion
Sont envers lui, selon loy ordonnee,
Par ton meffait, a autre t’es baillee.
Destruis seréz du petit au plus grant,
Ton nom pery, com rebelle yes salee :
20 Avise toy, fausse ville de Gand.
Mainte fois a faitte desloiauté
A tes seigneurs et a ta region,
Et maint pais instruit et enhorté
A leurs princes faire sedicion,
25 Dieux, par le Roy, en prant pugnicion.
A Rosebech, enmy vostre contree,
Pour vous valu d’Artevelle l’armee,
.xxvi. mille mourant sur le champ.
Vous aréz pis ains que passe l’annee :
30 Avise toy, fausse ville de Gant
L’envoy
Princes, n’atten ne yver ne esté,
Mais couppe l’arbre ou cilz mauvais fruit pant,
Et lors sera ton jardin essarté.
Mieulx vault un lieu seul estre deserté,
35 Que le laissier regner en tel bobant.
Tu as raison, se bien m’as escouté :
Avise toy, fausse ville de Gand.
