Balade 93 : Venéz a moy, li hault prince ancien (XCIII)
Autre Balade
Venéz a moy, li hault prince ancien,
.ix. hommes preux, [et].ix. femmes de terre,
Trois Sarrasin, trois Juif, trois Crestien :
Hector le fort, Alixandre a conquerre, 21d
5 Julles Cesar, aléz Josué querre,
David aussi, Judas Machabeus,
Charlemaine, Godefroy et Arthus
Pour traictié faire entre le Franc et l’Angle,
[Car] par eulx deux sont mains pais perdus :
10 Des or fust temps d’avoir paix, ce me semble
Semiramis avecques ces preux bien,
Deyphile, Marsopye o lui erre,
Synoppe aprés, Panthasilee tien,
Tantha que j’aim, va Thamaris requerre,
15 Yppolite, Menalope desserre,
Toutes et touz .xviii. sailléz sus,
Mettéz raison et le droit au dessus,
Et ne vueilléz soustenir le triangle.
Qui tort ara, monstréz li voz vertus :
20 Des or fust temps d’avoir paix, ce [me semble].
En cest estat n’a le monde nul bien.
A ce coup ci faittes ou paix ou guerre :
A l’un des deux ne doit demourer rien.
Se la paix n’est, vé a toy, Angleterre !
25 Car tu ne doiz contre raison acquerre.
Voy en Merlin, saiche que dit li Bruths :
Par Orgueil fut li mondes confundus,
Diable[1] en devint Lucifer qui fut ange :
Acorde toy, ou tes noms yert conclus :
30 Des or fust temps d’avoir paix, ce [me semble].
L’envoy
Nobles princes, Roys, empereurs cremus,
Roines, dames, pour moy soiéz ensemble.
Je vueil raison, soiéz donc mes escus :
Des or fust temps d’avoir paix, ce me semble.
[1] Ms. diables
