Balade 92 : Esbahis sui, et ce n’est pas merveille (XCII)

Balade

                        Esbahis sui, et ce n’est pas merveille,
                        Comment les gens sont si descongneu
                        Que l’un n’oit bien puis qu’il a bonne oreille,
                        L’autre a bon oeul et si n’a rien veu.
5                      Maint ont aprins et si n’ont riens sceu,
                        Quant selon droit font bien le contraire.
                        Par Foul Plaisir sont souvent deceu :
                        Bon congnoistre fait que chascun scet faire.

                        Cellui qui dort a plus que cilz qui veille,
10                    Le reposant a plus que son deu.
                        Le bien n’a pas toudis cilz qui travaille :
                        Sçavéz pour quoi ? Car il n’a pas pleu.
                        Le saige clerc qui science a leu
                        N’a pas a lui grace sceu atraire.
15                    Pourquoy’ ? Pour ce que bien n’est congneu :
                        Bon congnoistre fait que chascuns scet faire.

                        Entendemens et Verité sommeille,
                        Blandir, Mentir ont leur regne acreu
                        Et Foul Plaisir de regner s’appareille,
20                    Qui de pieça Malice a conceu.
                        Euvrent les oeulx ceuls qui ne l’ont sceu,
                        Haucent les bons, les chetis facent taire,
                        Lors seront il saige et bien pourveu :
                        Bon congnoistre fait que chascun scet faire.

                        L’envoy

25                    Prince, li bon doivent estre esleu,
                        Le bien avoir, et a tous doivent plaire,
                        Et les chetis soient inpourveu :
                        Bon congnoistre fait que chascun scet faire.