Balade 91 : Faire semblant d’une chose vouloir (XCI)

Autre Balade

                        Faire semblant d’une chose vouloir
                        Et en derrier ordonner le contraire
                        Ne fait mie les cuers des gens avoir.
                        Ainçois les fait de vraie amour retraire.
5                      Dire une chose et puis une autre faire
                        A bouche et cuer n’est pas bien concordable.
                        Se le cuer ment, la bouche se doit taire :
                        En tous temps doit homme estre veritable,

                        Ne par mentir ne doit nul decevoir,
10                    Verité doit garder en son affaire.
                        S’il promet rien, s’en face son devoir.
                        Ne mente ja, ainçois se laist detraire,
                        Car Verité, qui est le droit aumaire
                        De toute loy, veult toudis estre estable
15                    Sanz mal querir, n’a nul angle contraire :
                        En tous temps doit homme estre veritable.

                        Mentir si est, quant cuer fait esmouvoir
                        Bouche a parler et monstrer doulz viaire
                        D’aucun ottroy que cuer veult remouvoir :
20                    Lors ment le cuer, qui est proprietaire,
                        Quant par bouche promet, et veult deffaire
                        Ce que dit a : il est droit mensongable.
                        Gardons nous tous d’encourre en tel affaire :
                        En tous temps doit homme estre veritable.

                        L’envoy

25                    Prince, la loy nous fait a tous sçavoir
                        Que Verité doit estre pardurable
                        Et que chascuns la doit prandre et avoir :
                        En tous temps doit homme estre veritable.                                        21c