Balade 89 : En un vergier d’une flour de lis nestre (LXXXIX)
Autre Balade
En un vergier d’une flour de lis nestre
Vi .x. branches, chascun a flour de lis.
En divers lieus et chascune son estre
Et en ses flours ot divers noms escrips.
5 En l’une avoit Yolant, qui a prins
En Arragon son siege ou est plentee.
En l’autre flour sera par lettre Henris :
La maistre fleur doit moult estre honouree.
Car d’empereurs a destre et a senestre
10 Est celle fleur de Roys, d’empereris,
Qui le Bar d’or voult de ses flours repestre, 11a
La droicte flour qui a Coucy saillis,
An Anghien Philippes, ce m’est vis.
Charles encor n’a prins bont ne volee,
15 Marie yra a Namur. Pour ce dis :
La maistre flour doit moult estre honouree.
Bonne est aprés au viaire celestre,
Douce et plaisant ange de paradis,
La sixte flour, Jehanne furent sa destre
20 Puis Odouart, Yolend et Loys.
Toutes ces flours feront en maint pais
Croistre leur nom, flourir leur renommee,
Dont je conclus qu’entre tou[te]s ses dis
La maistre flour doit moult estre honouree.
L’envoy
25 Princes, bien doit li noms estre chieris
De Marie, fille de France nee.
Quant ta suite va en tant de pais,
La maistre flour doit moult estre honouree.
