Balade 88 : Du doubz vergier de toute douçour plain (LXXXVIII)

Balade

                        Du doubz vergier de toute douçour plain
                        Vi planter hors une plante de lis,
                        Qui en Barrois reprinst et fist son raim
                        Long, grant et droit, et getta, ce m’est vis,
5                      .vi. nobles flours pour repeupler pays,
                        Et tel douçour, ains qu’elle fut antee,                                          20d
                        Que de l’odeur fut chascuns esbahis
                        Qu’elle sema, et en mainte contree.

                        De celle flour saillit au primerain
10                    Une autre flour, Yolet au cler vis :
                        En Arragon rent s’odour soir et main.
                        Et l’autre flour estoit pourtrais Henris
                        De lettres d’or, de Marie maris
                        Qui d’Angleterre est et de Coucy nee :
15                    Par ces flours sont mains peuples resjouis
                        Qu’elle sema, et en mainte contree.

                        La tierce flour jetta racine et grain
                        A Anghien, Philippe estoit escrips.
                        Charles aprés et Marie que j’aim,
20                   En toute Bonne, ange de paradis,
                        Belle en tous cas et courtoise en ses dis.
                        Cilz trois derrain n’ont racine gettee,
                        Mais par les flours yert chascuns replenis
                        Qu’elle sema, et en mainte contree.

                        L’envoy

25                    Princes, la flour qui tant doit avoir pris
                        Est Marie, fille de Roy clamee,
                        Qui par ses flours a François resjouis
                        Qu’elle sema, et en mainte contree.