Balade 87 : Je puis asséz comparer no labour (LXXXVII)

Balade

                        Je puis asséz comparer no labour                                                 20c
                        A Turturus qui tous temps travailla,
                        .xxxviii. ans servit dame Trambour[1]
                        Et pour son fait mainte grief nuit veilla.
5                      Mais en ce temps oncques rien n’acquesta,
                        Ainçois toudis fut Turturus en place
                        Vestu d’un sac et d’un pourpoint qu’il a :
                        Autel est il de Gillet et d’Eustace.

                        Ces deux toudis portent la paste au four,
10                    On envoie l’un ça, l’autre dela.
                        Leurs maistres ont a eulx si grant amour
                        Que ja estas donné ne leur sera.
                        Mais s’ilz sont mors, on les advancera :
                        A leur vivant leur fait Dieu belle grace
15                    Qu’aprés la mort l’exemple d’eulx courra :
                        Autel est il de Gillet et d’Eustace.

                        Las ! cilz qui n’a servi c’un povre jour
                        A advisé ce qu’il demandera,
                        Et est meri par blandir son seigneur[2].
20                   Benoist est il qui bien pour bien rendra,
                        Et qui a tous fera ce qu’il vourra
                        Estre a lui fait. Autel a autre face,
                        Adonc ce mot de dire cessera :
                        Autel est il de Gillet et d’Eustace.

                        L’envoy

25                    Princes, tel sert et toudis servira
                        Qui ja n’ara homme qui bien lui face.
                        Ainsi est il, ainsi fut et sera,
                        Autel est il de Gillet et d’Eustace.

[1] Saint Hilaire corrige en Erambour

[2] Saint Hilaire corrige en seignour