Balade 86 : Depuis la mort du vaillant Roy Basin (LXXXVI)
Autre Balade
Depuis la mort du vaillant Roy Basin 20d
Qui de Thoringe avoit la seigneure,
Et du fleuve qui chiet dedenz le Rin
Sur lequel chiet la cité orgueillie
5 Que duc Guerin avoit la[1] seognourie,
A son vivant en[2] fut sires claméz,
Ne fut li temps si dolereus d’asséz
Pour la cité rebelle qui commence,
Comme a present approuche de touz lez
10 Qu’elle sera mise a obeissance.
Et revendra par un duc orphenin
Qui domptera son orgueil et folie,
Et par force la conquerra en fin,
Tant par un Roy com par un duc d’Austrie.
15 Et si sera aliéz en Neutrie.
Lors li grans vaulx sera de gens peupléz,
Et d’autre part seront la assembléz
Mains rebelles qui contresteront[3] ce.
Mais au derrain plourra celle citéz,
20 Qu’elle sera mise a obeissance.
La periront les .xii. en ce hutin,
Et maint autre soustenant leur partie,
Quant ru du sang courra par le chemin.
Ainsi l’a dit pieça la prophecie,
25 Et rasera celle cité unie
Qui jadis fut aux seigneurs trespasséz
Portant l’escu de trois aigles bandéz.
En ce temps la aront les Bars souffrance,
Pour la ville yert l’orphenin renomméz,
30 Qu’elle sera mise a obeissance.
L’envoy
Prince, je croy que li enfes est nez
Qui doit en lui avoir ceste puissance
De la ville. Soiéz reconfortéz,
Qu’elle sera mise en obeissance.
[1] Saint Hilaire corrige en a
[2] Saint Hilaire corrige en en
[3] Ms. contrester en ce
