Balade 85 : Joie, deduit, leesce, esbatement (LXXXV)

Balade

                        Joie, deduit, leesce, esbatement,
                        Plaisir, dancier, douçour ne congnoissance,
                        Chanter, dancer, vivre amoureusement
                        N’ont leur saison ou royaume de France,
5                      Fors que courrous, haine et desplaisance
                        Et convoitier de l’un l’autre l’avoir,
                        Pour amasser or, joiaulx et finance :
                        Tout ce vous fait Renommee sçavoir,

                        Qui ne parle fors de nostre tourment,
10                    Et que nulz homs n’y va a souffisance
                        Ne n’a regart a vray entendement,
                        Ne a raison, ains toute la plaisance
                        Est d’un chascun pour aquerir chevance,
                        Et ne lui chaut comment la puisse avoir,
15                    Soit bien ou mal, par force ou par puissance :
                        Tout ce vous fait Renommee sçavoir.

                        Pour ce y vivent[1] pluseurs dolentement,
                        Et sanz avoir nulle bonne esperance
                        De bien venir ne vivre liement.
20                   Car, chascun jour, mal sur autre s’avance,
                        Destruction, tristesce, oultrecuidance,
                        Aussi orgueil. Nul n’y fait son devoir,
                        Dont advenir doit mainte pestillence :
                        Tout ce vous faire Renommee sçavoir.

                        L’envoy

25                    Prince, mettéz sur ces poins ordonnance
                        Que vous povéz a vostre oeul percevoir,
                        Ou l’en vivra en grant desesperance :
                        Tout ce vous fait Renommee sçavoir.

[1] Saint Hilaire corrige en Pour ce vivent