Balade 84 : Je vous souhaide entre vous, gens de mer (LXXXIV)
Autre Balade
Je vous souhaide entre vous, gens de mer,
Qui avéz chaut dedenz vostre galee,
De ce bon vin frisque, friant et cler
Dont a la court est ma gueule arrousee,
5 Poucins, perdriz, connims a la gelee,
Et de ce pain legier de Carpentras,
Lit et coissin, la lavande et blans draps,
Beau cueuvrechief pour couvrir vostre teste,
Eaue douce, gesir hault et non bas.
10 Qui ainsi fait, ce n’est pas sens de beste.
Car vous estes en peril de tumer
Souventefoiz en tempeste formee,
Et lors vous fault en la soulte avaler,
Gesir envers et la gueule baee,
15 Pour la pueur vomir mainte goutee[1],
Le cul a bort mettre, crier : helas !
Le patron est en poupe souvent las,
Qui doubte fort le vent et la tempeste,
En requerant Dieu et saint Nicolas :
20 Qui ainsi fait, ce n’est pas sens de beste.
Le patron fait le timon gouverner :
A ponge, a ourse est leur chançon chantee,
Et proue fait les undes trescouper.
Deux mas y a, mainte antene aprestee,
25 […][2]
Becuit vireux, [et] poulz, puces et ras,
Le vermical, les vers en l’eaue a tas,
Au mieulx venir un pou de char mal preste :
A Paris sui en joie et en soulas :
30 Qui ainsi fait, ce n’est pas sens de beste.
L’envoy
Enfans, veuilléz [ici] tost aborder, 20a
Car la puet on mener et joie et feste,
Viande et vin et tout bien recouvrer :
Qui ainsi fait, ce n’est pas sens de beste.
[1] Ms. goute ; Saint Hilaire édite la vomir et laisse goute à la rime.
[2] Vers manquant non signalé par Saint Hilaire
